رئيس التحرير: صلاح العلاج ملك شركة دي أن أيه الكويتية للتجارة العامة

محمد خلف الشمري يكتب | مطلب شعبي مهم !.

Oct 24 2019
7281
 0

أيفون ابو الشباب ملعلع حده بأغنية ( اخر طرب ) راشد الماجد تـطـلـبــوني شـي .. منـي وش تـبــون .. بـس انتـوا ما لكـم فينـي شـغـل .. إيــه أحبــه لا وحـبــي لــه جـنــون .. و اللي يمنعني ترى مالـه أمــل !.

الخبير : خير اللهم اجعله خير ايه سمفونية الطرب اللي انت عاملها اليوم ؟.

الشاب : ومنين يجي الخير يا سعادته ؟.. اللي انت تسمعه اهداء خَص نص من ابو الشباب لكل المواطنين بالكويت نَفَر نَفَر ونفره نفره !.. والله شي يحير الشعب لهم 323 يوم بهشتاغ إسقاط القروض اللي كسرت ظهورهم !.. واثناء مدة الهشتاغ كل يوم والثاني يطّلع لك واحد من الوزراء يقول ( شسالفة ؟!. ) الاحتياطي العام في الرمق الاخير ( مادري نعطيه جغمة ماء ؟. ) وثاني يوم ( على الأقل نطروا أسبوع ! ) من تصريحه تجيك المطمه الكبيرة بإعطاء دولة ما مساعدات مليارية ( للعلم حنا في نظر العالم البقره الحلوب ) !.. مادري هل هو تحدي صارخ فاضح ( أشق هدومي واركض بالشارع بشورت وكاب ) لشعب مغلوب على أمره ام طناش ثلاثي الأبعاد والرابع دخل ؟.

الشايب : هوانها وهي تهون وياعل من لامك يأكل فشار على رأي معتز مطر !.. كلنا بالهواء سواء يابوك اللي تعاني منه اعانييه انا وعيالي للاسف موظفين ( بؤساء ولكن نتجمل ) على الطل كل معاشاتنا ديون بديون ناخذ من هذا ونحط بحلق هذاك لنا سنين طويلة نسال الله الفرج لنا ولكم اجمعين .

الرجل : من ديوانيتنا الموقرة أطالب برحيل ( دام الشعب ساكت ) الحكومة مع مجلسنا الصامت (يمكن قضية دخول  المجلس اهم من المطالبات بإسقاط القروض؟)  لان نوابه صاروا ضد الأمة !.. لان ماهو معقول سكوتهم على الوضع المادي للمواطنين اللي كل يوم بعوز ؟.. وعلاوه ( واحشانا ) على جذا تغميضة عيونهم عن فساد مرعب بالبلد بكل المجالات ( عد وخربط ) !.

المعاق : الله يكون بالعون ونصيحتي اذا تبونها تسقط وتبون الحياة الكريمة عليكم بساحة الإرادة لانها هي الحل الوحيد وسلامتكم !.. وتـطـلـبــوني شـي .. منـي وش تـبــون .. بـس انتـوا ما لكـم فينـي شـغـل ( ولسان طالع لنا ) !.

المتمولس : كنت اسولف وقلت اسمك بالغلط احسبني يالغالي جالس معاك ؟.. واللي سمعني ضحك ثم قال بعبط اسلم اسلم دام محد يسمعك !.. وفي هذه الاثناء رفع على مسامعنا الشيخ زغلول اذان الظهر .


أضف تعليق